Die adjunkminister in die presidensie vir vrouens, jeugdiges en persone met gestremdhede, prof. Hlengiwe Mkhize, wat verlede week in die ouderdom van 69-jaar aan longkanker oorlede is, sal eerskomende Saterdag tydens ’n sogenaamde kategorie 2-begrafnis in Gauteng ter ruste gelê word.
Prof. Mkhize – wat ’n dienende adjunkminister was – kom in aanmerking vir ’n Amptelike Begrafnis wat – ingevolge die tweede kategorie – voorbehou word vir onder andere ’n adjunkpresident, adjunkspeaker van die nasionale vergadering en die adjunkvoorsitter van die Nasionale Raad van Provinsies.
Prof. Mkhize is in 2017 met longkanker gediagnoseer en het haar laaste dae in die Wits Donald Gordon Mediese Sentrum in Johannesburg, Gauteng, deurgebring.
Sy laat haar eggenoot, Pat Mkhize, drie dogters, ’n seun en kleinseun agter.
Die landsvlag sal van môre af regoor die land halfstok hang tot die aand van haar teraardebestelling.
Fotokrediet: The South African
