15 Julie 2022
Die ontslape Nazi-leier, Adolf Hitler se goue Andreas Huber omkeerbare polshorlosie word binnekort opgeveil en kan tussen $2- en $4-miljoen (R34-miljoen tot R68-miljoen) haal by die veiling, wat op 28 Julie deur die veilingshuis, Alexander Historical Auctions aangebied word.
Volgens ‘n verklaring op die veilinghuis se webtuiste het Hitler die horlosie waarskynlik op 20 April 1933 by Huber gekry as geskenk vir sy 44ste verjaarsdag.
Luidens berigte is die horlosie op 4 Mei 1945 deur ‘n Franse soldaat uit Hitler se bergwoning, Die Berghof in Bavaria geplunder. Volgens Alexander Historical Auctions het van die wêreld se beste horlosiemakers en kenners die horlosie ondersoek en bevind dat dit wel aan Hitler behoort het.
Die horlosie-parte is gemaak deur LeCoultre en kan 180 grade draai om die horlosie se gesig te beskerm. Die omhulsel is gegraveer met die Nazi se Swastika-simbool asook die arend. Daar is ook drie datums – 20 April 1889, Hitler se geboortedatum, 30 Januarie 1933 toe hy as bondskanselier van Duitsland verkies is en 5 Maart 1933 toe die Nazi-party die verkiesing gewen het.
