5 Januarie 2022
Die organisasie teen belastingmisbruik, OUTA, het ‘n beroep op die regering gedoen om die huidige vyf-jaarlikse hernuwing van rybewyse eerder te vervang met ‘n tien-jaarlikse hernuwingsmodel.
Die uitvoerende hoof van OUTA, Wayne Duvenage sê die verandering is noodsaaklik aangesien die huidige stelsel feitlik in duie gestort het weens voortslepende tegniese kwessies.
Die organisasie beweer dat daar tans ‘n agterstand van nagenoeg 500 000 lisensie-kaarte is waarvoor bestuurders wag, aangesien die masjien waarmee die kaarte vervaardig word, buite werking is.
Duvenage sê voorts gaan die lisensie-aansoeksentrums ook gebuk onder korupsie en administratiewe kwessies wat daartoe lei dat die wagtydperk vertraag word.
Hy sê die tyd het aangebreek dat die hele stelsel – van padwaardigheidtoetse tot bestuurslisensies – hersien moet word om aan te pas by die teenswoordige omstandighede.
