25 Februarie 2023
Die minister van minerale hulpbronne en energie, Gwede Mantashe sê die voormalige Eskom-hoof, André de Ruyter moenie nou ‘n “klip in die bos gooi en hoop dat ‘n wilde dier gaan uitkom nie.”
Mantashe meen De Ruyter moet die name van diegene noem wat hy van korrupsie by Eskom beskuldig het.
Mantashe het gister die parlementêre portefeuljekomitee oor minerale hulpbronne en energie toegespreek, waartydens hy ‘n beroep op parlementslede gedoen het om te reaeer op die bewerings deur De Ruyter.
LEES OOK: DA DIEN AANSOEK IN VIR INLIGTING OOR BEWEERDE KORRUPSIE BY ESKOM
Hy het verder De Ruyter gekritiseer vir sy rol in die kragkrisis. Volgens hom was De Ruyter daarvoor verantwoordelik dat mense vertroue in Eskom verloor in dieselfde tyd wat privaat en onafhanklike kragverskaffers op die been gebring is.
Mantashe het verder gesê dat hy uitsien na die aanstelling van ‘n minister van elektrisiteit omdat “hy verantwoordelik sal wees vir die einde aan beurtkrag.” Hy sê daar is ses kragstasies met beskikbare energie van minder as 50%.
“Die bestaande kragstasies moet herbou word, en geoptimaliseer word sodat dit tot die kragnetwerk gevoeg kan word.”
LEES OOK: “DE RUYTER HET ESKOM IN ONEER GEBRING,” SÊ WOORDVOERDER
Mantashe meen verder dat “kampvegters vir hernubare energie in ‘n droomwêreld leef as hulle dink dat hernubare energie ‘n einde aan beurtkrag sal bring, omdat dit minstens 12 tot 18 maande neem vir dié krag om aan die netwerk gekoppel te word.”
