26 April 2023
Die organisasie OUT LGBT Well-being het sy kommer uitgespreek oor ‘n boodskap wat die voorsitter van die DA se federale raad, Helen Zille, op sosiale media geplaas het wat hulle voel moontlik kan indruis teen die regte van lede van die LGBTIQ+-gemeenskap.
OUT LGBT Well-being is dieselfde organisasie wat Steve Hofmeyr voor stok gekry het oor soortgelyke uitlatings.
In die tweet het Zille gevra of dit nou as onvoldoende “woke” beskou word om net bloot gay te wees en of ‘n persoon nou transgender moet wees om toegang tot die sogenaamde innerlike heiligdom van die stam te kry.
Sy het ook in die boodskap gevra of alle vroue in die proses vertrap en gestereotipeer moet word om die vordering wat hulle die afgelope vyftig jaar gemaak het uit te wis.
Die organisasie sê Zille se uitlatings dra by tot ‘n klimaat van stigma, marginalisering en diskriminasie. In ‘n verklaring meen hul dat Zille nie die verskil verstaan tussen seksualiteit en geslagsidentiteit nie.
Die organisasie sê hulle eis dat Zille haar Tweet moet verduidelik.
Foto: Biznews
