1 Junie 2022
Vandag 20 jaar gelede – op 1 Junie 2002 – het die Protea krieketspeler en kaptein, Hansie Cronje in die ouderdom van 32 in ‘n vliegongeluk gesterf.
Sy geskeduleerde vlug van Johannesburg terug na sy huis in George is weens gure weersomstandighede gekanselleer. Hy is egter ‘n vlug aangebied op ‘n Hawker Siddeley HS 748-turboprop-vliegtuig as die enigste passasier saam met twee vlieëniers.
Die vliegtuig het in die Outeniqua Berge vasgevlieg. Al drie insittendes is op slag dood. In 2006 het die hooggeregshof bepaal dat ‘n fout deur die vlieëniers tot die ongeluk gelei het.
Cronje, het ‘n suksesvolle krieket-loopbaan in die 1990’s gehad, met die Protea’s wat onder sy leiding 27 toetse gewen het asook 99 een-dag internasionale wedstryde.
Hy is in 2004 aangewys as die 11de beste Suid-Afrikaners, ondanks die omstrede wedstrydknoeiery-skandaal wat daartoe gelei het dat hy vir lewenslank van krieket verban is.
Sy broer, Frans Cronje het in ‘n plasing op sy Facebook-blad hulde gebring aan sy broer. “Ons onthou om steeds as ‘n mens wat baie omgegee het vir sy naasbestaandes, wat baie wys en inspirerend was.”
Hy meen dit is wonderlik dat mense steeds so lief is vir Hansie na al die jare. “Hy sal steeds bekend staan as ‘captain our captain.'” ‘n Golfdag in sy herinnering sal Vrydag, 3 Junie in Schoemanspark in Bloemfontein gehou word.
Volgens Frans sal geld, wat tydens die dag ingesamel word, gebruik word om die Ou Klipkerk in Senekal te herstel.
