8 Desember 2022
Die minister van minerale bronne en energie, Gwede Mantashe, het vanoggend projekooreenkomste onderteken met vyf voorkeurbieërs vir die Onafhanklike Groenkragvoorsieningsverkrygingsprogram (REIPPPP).
Die departement van minerale bronne en energie voer aan dat dié projekte tot 1000 Megawatt se opwekkingsvermoë tot die kragnetwerk kan voeg.
Bloomberg berig dat Suid-Afrika verlede jaar 25 wind- en sonkragprojekte gekies het om deur private ontwikkelaars gebou te word. Dít in ‘n poging om die land se afhanklikheid van steenkool vir elektrisiteit te verminder en hopelik beurtkrag hok te slaan.
Dié planne het egter verskeie vertragings en uitdagings in die gesig gestaar omdat daar nie ‘n finansiële ooreenkoms bereik kon word nie.
Volgens die departement is ‘n sesde maatskappy reeds geïdentifiseer, maar moet sekere ooreenkomste nog afgehandel word. Drie van die vyf projekte is in Noordwes, en twee is in die Vrystaat.
