1 September 2021
Die minister van maatskaplike ontwikkeling Lindiwe Zulu het die groenskrif oor die voorgestelde verpligte Nasionale Fonds vir Maatskaplike Sekerheid onttrek.
Die onttrekking volg op heftige teenkanting teen die groenskrif wat twee weke gelede in die Staatskoerant gepubliseer is.
Daar is geen rede verskaf vir die onttrekking nie.
LEES OOK: AFRIFORUM VERWERP PLANNE VIR STAATSBEHEERDE MAATSKAPLIKE SEKERHEIDSFONDS
Die groenskrif het voorgestel dat alle Suid-Afrikaanse salaristrekkers tot 12% van hul verdienste in ’n nuwe beleggingsfonds, wat deur die regering bestuur sou word, moes betaal.
Die groenskrif is sonder die kabinet se goedkeuring in die Staatskoerant gepubliseer en die tesourie het gesê dit is nie amptelike beleid van die regering nie.
Intussen het die vakbond, Solidariteit die terugtrekking van die groenskrif verwelkom.
Volgens die bestuurshoof van Solidariteit, dr. Dirk Hermann was die groenskrif in wese absurd, irrasioneel, onwerkbaar en ongrondwetlik.
Hy sê Solidariteit sal voortgaan met sy weerstand en regsaksie teen die groenskrif indien dit weer in die toekoms in ‘n ander vorm lewe kry.
Hou Afrikaans op die lug
