16 Augustus 2021
Die Outomobiel Assosiasie (AA) het motoriste herinner dat die grasietydperk vir die verlenging van voertuiglisensieskyfies en rybewyse aan die einde van Augustus tot ‘n einde kom.
Dié grasietydperk vir die hernuwing van rybewyse en voertuiglisensieskyfies is ingestel weens die Covid-19-pandemie asook voortslepende probleme met die hernuwingstelsel.
Volgens die AA het die regering aangedui dat die grasietydperk nié verder verleng sal word nie.
Die grasietydperk, wat op 31 Augustus verval sluit eerstens voertuiglisensieskyfies, tydelike permitte en padwaardige sertifikate in wat tussen 26 Maart 2021 en 31 Mei 2021 verval het.
Rybewyse, leerlinglisensies en professionele rypermitte, wat tussen 26 Maart 2020 en 31 Desember 2020 verval het, se grasietydperk kom ook op 31 Augustus tot ‘n einde.
Die AA meen hoewel die tyd vir motoriste om hulle lisensies te hernu, amper verby is, is die tyd ook verstreke vir die regering om sy hernuwingsproses te verbeter.
Volgens die organisasie het die regering toegegee dat daar probleme met die hernuwing van lisensies is, maar steeds is die grasietydperk nie verleng nie. “Dit beteken dat motoriste nou afhanklik gaan moet wees van ‘n stukkende stelsel.”
Hou Afrikaans op die lug
