7 Maart 2022
Die minister van vervoer, Fikile Mbalula, het gewaarsku dat sy departement nie die grasietydperk vir motorlisensies ná 31 Maart sal verleng nie.
Hy het gesê dat motoriste wat van volgende maand af met rybewyse bestuur wat reeds verval het boetes en moontlike vervolging in die gesig staar.
Mbalula het tydens ‘n mediakonferensie gesê die land het tans ‘n agterstand van meer as ‘n halfmiljoen hernude rybewyse, maar dat lisensiesentrums genoeg kapasiteit het om dié agterstand uit te wis en dat tydgleuwe beskikbaar is om vir hernuwings te bespreek.
Die nasionale Covid-19-inperking het lisensiesentrums gedwing om te sluit, wat gelei het tot ‘n agterstand van voertuig- en bestuurslisensies wat verval het.
Dit is vererger nadat die land se enigste lisensie-drukmasjien aan die einde van verlede jaar onklaar geraak het.
