14 Desember 2023
Die Outomobiel Assosiasie (AA) meen motoriste sal na verwagting 2024 begin met goedkoper brandstof.
Die AA sê luidens voorlopige data van die Sentrale Energiefonds sal beide grade petrol, diesel en paraffien na verwagting ‘n afname toon. “Dit sal veral verligting bring vir motoriste in Januarie, wanneer almal se finansies bietjie swaar trek.”
Volgens die voorlopige data sal 93-oktaan petrol met nagenoeg 68-sent per liter daal, en 95-oktaan petrol kan 82-sent per liter goedkoper word. Diesel kan glo met R1,50 per liter daal, terwyl paraffien met sowat R1,42 per liter goedkoper kan wees.
Die AA sê die daling kan toegeskryf word aan laer internasionale produktepryse, alhoewel die Rand swak presteer het teen die Amerikaanse doller.
“Die verwagte daling sal ook ‘n welkome verligting wees vir mense wat met vakansie gaan en terugkeer net voor die skole heropen.”
