17 Desember 2023
Die nie-winsgewendeorganisasie, Gift of the Givers het vroeër vanmiddag gesê dat die Suid-Afrikaner, Gerco van Deventer glo vrygelaat is, ses jaar na hy gyselaar geneem is in Libië op 3 November 2017.
Volgens die organisasie is hy na ‘n hospitaal in Algerië geneem. Die koördineerder van Gift of the Givers, Imtiaz Sooliman, sê hy het Saterdagaand ‘n oproep van ‘n betroubare tussenganger gekry dat Van Deventer wel vrygelaat is.
Van Deventer is in 2018 aan Al-Kaïda in Mali verkoop. Gift of the Givers het kort daarna betrokke geraak by onderhandelings vir sy vrylating. Die terreurorganisasie wou aanvanklik $500 000, of sowat R9,2-miljoen vir sy vrylating hê.
Volgens Sooliman het hy nou die Suid-Afrikaner geword wat vir die langste tydperk as gyselaar aangehou is.
Sy vrou, Shereen het vroeër gesê dat sy nog nie hoop verloor het dat haar man leef nie. Sooliman sê reëlings sal getref word sodat Gerco so gou moontlik kan terugkeer na sy vrou, en 12-jarige seun Asher.
