‘n Gestremde VF Plus-raadslid het sy rug beseer toe hy, sy helper en ‘n werker van die Rand-West-plaaslike munisipaliteit in Randfontein van ‘n stel trappe by die munisipale kantore in afgetuimel het omdat die hysbak nie werk nie.
Die VF Plus lid van die provinsiale wetgewer in Gauteng, Jaco Mulder sê Charles Brough, wat in ‘n rolstoel is, moet elke keer wanneer die hysbak buite werking is, deur mense op- en af gedra word na die raadsaal wat op die eerste verdieping geleë is.
Mulder sê Brough is Donderdag voor ʼn raadsvergadering opgedra, maar met die afkomslag het een van die helpers se voet gegly en hy het sy balans verloor. Al drie het beserings opgedoen. Brough het sy rug beseer.
Mulder sê die hysbak was ook in Januarie vir drie maande buite werking. Die hysbak is in Maart herstel, maar was na ʼn maand weer stukkend.
“Dit is nie net die tweede keer dat die hysbak buite werking is nie. Twee jaar gelede was die dit vir meer as vyf maande buite werking en het die party ook die LUR gevra om in te tree.”
Hy sê die party neem kennis van die feit dat onderdele dalk moeilik bekombaar is, maar dit kan nie veroorsaak dat ʼn hysbak vir maande buite werking is nie.
Die VF Plus het reeds die LUR genader om weer dringend aandag aan die situasie te skenk.
