22 Julie 2022
‘n Verdagte voertuig – wat in Delmas, in Mpumalanga voorgekeer is – is inderwaarheid ‘n polisiebakkie van Thohoyandou, in Limpopo.
Beamptes op patrollie het die verdagte bakkie voorgekeer en by nadere ondersoek gevind dat die bak-deel in ‘n dieseltenk omskep is wat met ‘n seil bedek is.
Die twee insittendes – van Zimbabwese oorsprong – kon nie ‘n verduideliking gee waar die 500 liter diesel in die tenk vandaan kom nie en hulle is in hegtenis geneem.
By nadere ondersoek het dit geblyk dat die voertuig vervalste nommerplate op gehad het en in werklikheid aan die polisie in Thohoyandou behoort.
Die polisie se brigadier Selvy Mohlala sê die saak word ondersoek om vas te stel hoe die verdagtes in besit van die polisievoertuig gekom het.
