29 Desember 2021
Die departement van gesondheid het laat gisteraand aangekondig dat hy sy vroeëre wysigings hersien, wat handel oor die opsporing en self-afsondering van persone wat in kontak was met ‘n Covid-19-pasiënt.
Dit kom nadat die minister van gesondheid, dr. Joe Phaahla vroeër aangekondig het dat mense nié meer hoef te isoleer indien hulle in kontak was met iemand wat positief getoets het vir Covid-19 nie. Een van die redes wat aangevoer is, is dat die land se ekonomie dit nie kan bekostig nie.
Die departement se woordvoerder, Foster Mohale het in ‘n verklaring gesê dat hulle besluit het om die maatreëls oor kontakopsporing, kwarantyn en isolasie te hersien nadat hulle oorval is deur navrae.
Die ministeriële advieskomitee oor Covid-19 het ondermeer aangevoer dat kwarantyn nie doeltreffend is om die virus in toom te hou nie omdat net ‘n klein aantal kontakte van Covid-19-gevalle geïdentifiseer word.
Mohale sê die rede vir die hersiening is op wetenskaplike faktore gegrond, soos dat die meeste mense reeds ten minste een dosis van die Covid-19-entstof ontvang het. Hy sê terwyl alle kommentaar in oorweging geneem word sal alle vorige bestaande regulasies oor kontakopsporing en self-afsondering van toepassing bly.
