14 Junie 2021
Die premier van Gauteng David Makhura het die afgelope naweek gesê dat die huidige inperkingsregulasies nie streng genoeg is om die derde vlaag van infeksies in dié provinsie te keer nie.
Makhura sê die provinsiale regering is reeds in gesprek met die nasionale regering oor moontlike strenger regulasies, oor onder meer sosiale byeenkomste, en alkoholverbruik.
Hy sê die pandemie woed nou op sy ergste en geen deel van die provinsie is veilig nie. Intussen het die waarnemende minister van gesondheid, Mmamoloko Kubayi-Ngubane ook die afgelope naweek gesê dat sy baie bekommerd is oor die stand van sake in Gauteng.
Daar is gister 5 902 nuwe infeksies in Gauteng aangemeld – die derde keer in vier dae dat meer as 5 000 nuwe daaglikse infeksies aangemeld word.
Van dié gevalle is 2 348 in Johannesburg, 1 767 in Pretoria en 1 019 in Ekurhuleni.
