8 Mei 2024
Die minister van indiensneming en arbeid, Thulas Nxesi sê die ineenstorting van die woonstelblok in George dien as ‘n waarskuwing dat daar dringend meer aandag geskenk moet word aan veiligheidsregulasies binne die konstruksiebedryf.
Teen laat vanmiddag is 39 van die 75 werkers steeds vermis, terwyl die reddingspogings voortduur. Die gebou het Maandagmiddag ineengestort terwyl daar nog aangebou word.
Nxesi sê die laaste paar jaar was daar ‘n toename in die hoeveelheid geboue wat nie veilig is nie, en nie volgens maatreëls gebou word nie.
Hy het ook gevra dat mense geduldig moet wees, met sy department se ondersoek na die omstandighede van die voorval. Volgens hom gaan dit tyd neem gegewe die sensitiwiteit van die ondersoek.
Intussen sê die George munisipaliteit dat vrywilligers nou betrokke geraak het deur nooddienswerkers van Vitamien B-kompleksinspuitings te voorsien. “Die reddingswerkers werk sedert Maandagmiddag sonder ophou.”
