19 April 2021
‘n Groep verdagtes verskyn vandag in die Piet Retief-landdroshof in Mpumalanga na ‘n skietvoorval op die Pampoenkraalplaas in die Dirkiesdorp-omgewing op 9 April.
Vyf mans sal na verwagting vandag in die hof verskyn. Vier verdagtes is na die voorval in hegtenis geneem, terwyl ‘n vyfde verdagte later die week in hegtenis geneem is. Hy het glo Vrydag in die hof verskyn en sal na verwagting vandag saam met die ander vier verdagtes verskyn.
‘n Sesde persoon is volgens berigte ook glo in hegtenis geneem.
Die saak kom nadat die broers Amos en Zenzele Coka op die plaas doodgeskiet is. Hulle was na bewering deel van ‘n groot groep mense wat op die plaas was op soek na werksgeleenthede.
Volgens berigte het ‘n betoging glo ontstaan, waarna boere na bewering aangerand is en plaaswerkers verjaag is. Skote is glo uit noodweer afgevuur.
Intussen is polisiebeamptes op hoë gereedheidsgrondslag met honderde betogers, wat sedert vroeg vanoggend buite die hof saamdrom. Die hofgebou is egter afgesper.
Die polisie moes ook skokgranate inspan weens betogers, wat glo oproerig geraak het.
