21 April 2021
‘n 26-jarige onderwyseres van die Laerskool Dr. Havinga in Witpoortjie, Roodepoort is Sondag dood – twee weke nadat haar dogtertjie gebore is.
HELLP-sindroom is op 2 April by Simoné van Zyl gediagnoseer. Die sindroom veroorsaak dat die bloedplaatjietelling verlaag en dit lei tot bloedarmoede.
Haar en haar man, Juri se baba, Juané is op 4 April op 29 weke tydens ‘n keisersnee gebore.
Juri het aan Netwerk 24 gesê dat sy vrou later ontslaan is, maar is twee dae later weer opgeneem nadat haar toestand versleg het. Sy het Sondagoggend ‘n epileptiese toeval en toe ‘n hartaanval gehad.
Hulle baba sal nog in die hospitaal moet bly.
Juri het op sy Facebook-blad geskryf dat hy nog nie sin van sy vrou se dood kon maak nie. Hy sê sy dwaal in sy gedagtes rond. Hy het Simoné verder beskryf as opreg, eerlik, onselfsugtig en hardwerkend.
Die Laerskool Dr. Havinga het in ‘n Facebook-inskrywing hulde gebring aan Simoné en meen sy los ‘n groot leemte in almal se lewens. Hulle het hulle medelye betuig met Juri, Juané en ander naasbestaandes.
