21 Februarie 2022
Die premier van Gauteng David Makhura sê die provinsiale regering sal nou sy fokus verskuif van die Covid-19 ramp, na die ekonomiese ramp in die provinsie.
Makhura het ‘n oorlogskamer aangekondig, wat oor die volgende twee jaar sal fokus op die heropbouing van die ekonomie.
Makhura sê die lesse wat tydens die pandemie geleer is, soos om beter met die provinsiale en die nasionale regerings saam te werk, sal toegepas word om basiese dienste, behuising, mediese dienste en onderrig te lewer.
Hy sê ook dat meeste van hul projekte en planne om werk te skep en die ekonomie te laat groei, in die wiele gery is deur die Covid-19 pandemie.
Makhura sê die provinsiale regering sal daarop fokus om die kannabis bedryf in Gauteng uit te brei, om beter internet dienste te lewer aan klein besighede, en om die township ekonomie te laat floreer, deur dit te formaliseer.
