28 Mei 2021
Die Gautengse polisiekommissaris, generaal Elias Mawela het vanoggend dié provinsie se misdaadstatistiek vir die vierde kwartaal van die 2020/ 2021 boekjaar bekend gemaak.
Die syfers is dus vir die tydperk van 1 Januarie 2021 tot 31 Maart 2021.
LEES OOK: POLISIEBEAMPTE VAS NADAT HY NA BEWERING ‘N MAN BUITE ‘N DRANKWINKEL DOODSKIET
In dié tydperk is 966 moorde in Gauteng gepleeg teenoor 930 in dieselfde tydperk verlede jaar. Dit is ‘n toename van 3,9%. Poging tot moord het toegeneem van 1005 gevalle tot 1055 gevalle vanjaar.
Huisrooftogte het afgeneem met 1751 gevalle vanjaar teenoor 1773 gevalle in dieselfde tydperk verlede jaar.
Volgens Mawela het alle eiendom-verwante rooftogte afgeneem, behalwe vir veediefstal wat ‘n toename van 17,6% getoon het.
LEES OOK: MYNBESTUURDER IN SY MOTOR DOODGESKIET
By die Ivory Park-polisiestasie in die Ekuruhuleni-metro is die meeste moorde in Gauteng aangemeld. Vanjaar is 40 moorde hier aangemeld teenoor 19 in dieselfde tydperk verlede jaar. Dis ‘n toename van meer as 100%. Dié polisiestasie is nasionaal in die negende plek van die hoeveelheid moorde aangemeld.
In Hillbrow is 27 moorde teenoor 20 verlede jaar aangemeld. Dit is ‘n toename van 35%.
