3 Maart 2025
Die DA in die Tshwane-metro doen ’n beroep op eiendomseienaars om na te gaan of die munisipale waardasie van hul eiendom akkuraat en regverdig is. Indien eiendomseienaars beswaar wil aanteken moet dit voor Vrydag 2 Mei gedoen word.
Die metro het pas eiendomme herwaardeer met die doel om eiendomstariewe te hef wat van 1 Julie af betaalbaar sal wees.
Die munisipale waardasierol – wat inligting van elke belasbare eiendom bevat – is op die Tshwane-metroraad se webwerf asook by munisipale kantore beskikbaar vir besigtiging.
Die DA het intussen die stadsbestuurder laat weet dat eiendomseienaars nog nie in kennis gestel is van die herevaluering van hul eiendom deur middel van pos of e-pos nie, hoewel dit ingevolge die Wet op Munisipale Eiendomsbelasting vereis word.
Die Organisasie teen Belastingmisbruik, Outa, het op sy beurt die publiek aangespoor om hul besware eerder vroeër as later in te dien.
“Die waardasierol beteken die munisipaliteit het bepaal wat hulle dink jou eiendom werd is en vanaf 1 Julie 2025 sal jou eiendomsbelasting hierop gegrond wees,” sê Outa.
