17 Januarie 2022
Frankryk se departement van sport het vroeër vandag in ‘n verklaring gesê dat die Serwiese tennisspeler, Novak Djokovic moontlik ook nie in die Franse Ope sal kan deelneem indien hy nie teen Covid-19 ingeënt is nie.
Djokovic het ‘n kort ruk gelede in Serbië geland nadat die Australiese regering sy visum twee keer gekanselleer het. Dit kom nadat Djokovic vroeër in Januarie na Australië gereis het nadat hy mediese kwytskelding gegee is. Die regering meen egter dat hy nie aan hulle vereistes voldoen het nie.
LEES OOK: NOVAK DJOKOVIC SE VISUM GEKANSELLEER
Hy sou sy 21ste Grand Slam titel by die Australiese Ope verdedig, wat vandag begin het.
Frankryk se nuwe wetgewing oor ‘n entstofpas is gister in die parlement goedgekeur. Volgens dié entstofpas mag mense, wat nie teen die virus ingeënt is nie, nie openbare plekke soos teaters en restaurante binnegaan nie.
Die land se departement van sport sê daar sal geen uitsonderings op die nuwe wetgewing wees nie. Die Franse Ope-tennistoernooi begin op 22 Mei 2022.
