28 Maart 2023
Statistieke Suid-Afrika (SSA) sê nagenoeg 94 000 mense is in 2022 in die formele sektor afgelê.
Dít volgens die SSA se kwartaallikse indiensnemingpeiling wat vanoggend bekend gemaak is. Ná hierdie afleggings verskaf die formele sektor 266 000 minder poste as voor die Covid-19-pandemie. Teen die vierde kwartaal van 2022 het nagenoeg 9,9-miljoen mense in die formele sektor gewerk.
In Desember 2019, voordat die Covid-19-virus ontstaan het, het 10,2-miljoen mense in dié sektor gewerk.
Hierdie kwartaallikse indiensnemingspeiling (QES) tel ondernemings met ‘n omset van R300 000 per jaar.
Die formele sektor verwys na poste wat gereelde lone en standvastige ure verskaf. Hierdie werknemers het ook gewoonlik indiensnemingsregte, en moet ook belasting betaal.
