8 November 2022
Die Federasie van Afrikaanse Kultuurvereniginge, oftewel die FAK het reeds 600 handtekeninge ingewin ter ondersteuning van sy versoekskrif teen die moontlike verwydering van Voortrekker- en ander erfenisgrafte in Pietermaritzburg.
Die FAK sê die Msunduzi Munisipaliteit het reeds verlede maand planne bekend gemaak om die historiese Chief Albert Lethuli Erfenis-begraafplaas te “herwin” met die oog op toekomstige ontwikkeling van die terrein.
Mandla Zuma, ’n senior bestuurder van gemeenskapsdienste, het aangedui dat hulle reeds met n konsultasie proses begin het om die grafte op te grawe en die monumente af te breek. Die rede is dat hierdie begraafplaas sentraal geleë en op prima grond is.
Die gedenkbegraafplaas het grafte van so oud as 180 jaar.
Dit huisves ook grafte van onder meer Voortrekkers, veterane van die Tweede Wêreldoorlog, voormalige burgemeesters en skoolhoofde van die bekende skool Maritzburg College.
Die uitvoerende hoof van die FAK, dr. Danie Langner sê die oudste graf is die van die Voortrekker Hendrik (Hendrick) van den Berg. Sy seun, Pieter Adriaan, is saam met Pieter Retief vermoor.
“Die Pietermaritzburg-begraafplaas bevat drie groot monumente en talle gedenkplate. Die grootste monument is die Konsentrasiekampmonument vir die ongeveer 200 vroue en kinders wat in die Pietermaritzburg konsentrasiekamp gesterf het.”
Foto’s: FAK.
