22 November 2022
Eskom sê ‘n stemboodskap wat tans wyd op WhatsApp versprei word, is nié waar nie en saai slegs paniek.
In die boodskap beweer die persoon dat hy ‘n voorsitter van Old Mutual is en dat Suid-Afrikaners hulself moet staal vir ‘n totale ineenstorting van die kragnetwerk op 9 Desember. Die kragvoorsiener sê hy was reeds in gesprek met Old Mutual en meen daar is geen waarheid aan die boodskap nie.
Die persoon, wat nie sy naam wil noem nie, sê in die boodskap dat die voormalige minister van finansies, Trevor Manuel by Old Mutual betrokke is en dat hy daaglikse vergaderings met die personeel het.
Die persoon beweer dat daar teen 9 Desember ‘n sogenaamde “complete blackout” gaan wees en dat geen besighede hulle bedrywighede sal kan voortsit nie. Hy waarsku dan verder dat “president Cyril Ramaphosa ‘n nood-toestand gaan afkondig.”
Hy meen geen diesel sal beskikbaar wees nie, persone sal nie geld kan trek by banktellers nie, internet bankdienste sal nie beskikbaar wees nie, en selfoontorings sal binne 3 tot 8 ure nie meer sein kan verskaf nie.
Eskom het verder gevra dat mense nie die boodskap moet aanstuur nie.
