17 Mei 2023
Eskom sê hy neem met kommer kennis van plasings op sosiale media dat die land se kragnetwerk binnekort in duie gaan stort of dat ’n algehele kragonderbreking wink.
‘n Dokument van Eskom oor voorbereiding vir ‘n algehele ineenstorting van die netwerk word saam met die gerugte versprei, glo om die bewerings te staaf. Die boodskap voer aan dat die kragnetwerk sonder enige waarskuwing ineen kan stort.
Eskom sê daar is maatreëls in plek is om ’n ineenstorting te verhoed, soos byvoorbeeld beurtkrag wat toegepas word. Volgens ‘n mediaverklaring deur die kragvoorsiener is ‘n algehele ineenstorting van die kragnetwerk ‘n moontlikheid as groot kragstelsels ter sprake is, máár weens die instelling van beurtkrag is dit onwaarskynlik.
Eskom sal môre ’n mediakonferensie hou om die jongste oor die stand van die kragnetwerk en planne vir die winter met die publiek te deel.
Die bestuurshoof van Solidariteit, dr. Dirk Hermann het ook gereageer op die boodskap wat op WhatsApp aangestuur word. “Die Eskom-netwerk is onder groot druk en dit word deur beurtkrag bestuur. Daar is egter nie op die stadium sprake van ineenstorting van die netwerk nie.”
Volgens Hermann beteken hoër beurtkragfases nie dat die kragnetwerk nader aan ‘n ineenstorting is nie.
“‘n Ineenstorting gebeur as daar ‘n onverwagtige ingrypende insident is. Dit is al in ander lande byvoorbeeld deur ‘n natuurramp veroorsaak. Dit kan selfs in ‘n stabiele netwerkomgewing gebeur,” sê Hermann.
