15 Desember 2022
Die Eskom hoof Andre de Ruyter het die bewerings van die minister van minerale bronne en energie, Gwede Mantashe besweer – dat Eskom die staat wil omverwerp deur nie die beurtkrag krisis op te los nie.
“Die verbintenis daartoe om die nutsmaatskappy reg te ruk deur ons werknemers is onteenseglik.” het de Ruyter tydens ‘n perskonferensie gesê.
Hoewel hy nie Mantashe by name genoem het nie, het de Ruyter daarop gesinspeel dat hy nie meer die steun van sy politieke base geniet om voort te gaan in sy pos nie, en dat dit die groot rede vir sy bedanking is.
“Ek is in ’n posisie waar ek afhanklik is van groter politieke werkliheidsbesef en ondersteuning. In die lig van onlangse gebeurtenisse in die openbare forum, het ek agtergekom my posisie geniet nie meer daai ondersteuning en politieke relevansie nie.” het hy gesê.
Die minister van openbare ondernemings Pravin Gordhan het ook sy kollega in die kabinet berispe, en sê de Ruyter het nooit probeer om die staat omver te werp nie.
“Die antwoord is ‘n ondubbelsinnige nee, en ek dink dit is onregverdig en ongevraagd.” het Gordhan gesê.
Die Eskom direksie voorsitter, Mpho Makwana sê de Ruyter het hom al op die eerste dag van sy aanstelling as raadsvoorsitter ingelig dat hy sy toekoms as die Eskom hoof heroorweeg.
De Ruyter het sy bedanking op die 12de Desember ingedien, en hoewel Makwana dit aanvaar het, was dit steeds vir hom ‘n verassing dat hy besluit het om nou al te bedank.
de Ruyter sê dit was ‘n eer en ‘n voorreg om Eskom te lei, maar dat hy ook teleurgesteld is omdat hyt nie al sy doelwitte kon bereik nie.
Makwana sê hulle sal nou die proses van stapel laat loop op de Ruyter se opvolger te soek, voor hy in Maart 2023 die teuels sal neerlê.
