10 Januarie 2022
Eskom gaan dalk binnekort na die departement van minerale hulpbronne en energie verskuif word.
Die nutsdiensmaatskappy vorm tans deel van die departement van openbare ondernemings onder leiding van minister Pravin Gordhan.
Volgens president Cyril Ramaphosa is dié skuif in ooreenstemming met resolusies wat die ANC by sy afgelope nasionale konferensie geneem het.
Ramaphosa sê dit sal egter tyd neem voordat die party se jongste beleidsbesluite in werking gestel word.
Intussen het die DA gesê dat hulle van plan is om dié beplande skuif te beveg.
Die party se woordvoerder oor openbare ondernemings, Ghaleb Cachalia, het die besluit as irrasioneel en rampspoedig bestempel. Volgens hom kan Eskom moontlik nooit ten volle ontbondel word – ‘n stap wat die DA meen nodig is – indien dit net verskuif word nie.
