Ernst Roets groet die Solidariteit Beweging na 20 jaar

‘n Ou bekende by die Solidariteit Beweging, Ernst Roets, het oomblikke vroeër bevestig dat hy ná 20 jaar by die organisasie gaan bedank.

Hy sê in ‘n verklaring dat hy oortuig is dat daar vir hom meer ruimte buite die Solidariteit Beweging is om sy roeping uit te leef en om werklik iets vir mense te beteken. “Ek glo dat ek ‘n groter bydrae buite die beweging sal kan lewer.”

Roets sê hy het die afgelope paar weke opnuut besef hoe “ongelooflik sy vrou, kinders, familie en nabye vriende is.”

Volgens hom is hy oorweldig deur ‘n gevoel van dankbaarheid. “My opgewondenheid oor die hoofstuk wat voorlê is veel groter as die hartseer met die hoofstuk wat ek afsluit.” Hy sê hy is die Solidariteit Beweging, en veral AfriForum innig dankbaar vir die geleenthede wat hy gehad het, asook die ervarings wat hy kon opdoen.

Hy het die leierskap van die Solidariteit Beweging alle sterkte toe gewens met die groot taak wat op hulle skouers rus.