31 Oktober 2022
Met koeksisters is daar kerke gebou en aan die gang gehou.
Flukse baksters (en dikwels bakkers) het ure aan een koeksisters gebak en die opbrengste uit die verkope daarvan het dit moontlik gemaak om verskeie bakens in die land op te rig. Die bydraes wat deur die verkope van koeksisters opgelewer is het in 2002 vir Lida Strydom van Orania geinspireer om `n vereniging met die naam Kaalvoet op die been te bring.
`n Verwysing na die bekende woorde wat aan Susanna Smit toegedig word: “Ons stap liewer kaalvoet terug oor die Drakensberge as om onder die Britse vlag te staan.” Die eerste projek wat dié instelling aangepak het was om `n koeksistermonument op Orania in 2003 op te rig. `n Projek wat aanbeveel is deur `n argitek van Orania, Christiaan van Zyl.
Kaalvoet het onlangs besluit om `n ererol saam te stel vir koeksisterbakkers wat `n besondere bydrae in hulle gemeenskappe, of gemeentes, gelewer het met die bak van koeksisters. Die eerste toekennings is die afgelope naweek aan lidmate van die AP Kerk se Pretoria-Oos-gemeente oorhandig. Hulle het elk `n sertifikaat en `n koeksisterlapelwapen ontvang. Hulle name sal ook op die ererol aangebring word.
As jy reken dat `n koeksisterbakker `n besondere bydrae tot jou gemeenskap gemaak het kan jy hom of haar nomineer deur `n e-pos te stuur na [email protected].
