2 September 2022
Die ouers van die slagoffers wat in Junie in die Enyobeni taverne in Oos Londen oorlede is, oorweeg dit om regstappe te neem teen die departement van gesondheid in die Oos-Kaap.
Dit volg na hulle gister in kennis gestel is van die oorsaak van hulle kinders se dood, maar toegang geweier is tot die nadoodse verslag.
Die departement het nie redes verskaf waarom die verslag nie openbaar gemaak word nie.
‘n Aanvanklike verslag het aangedui dat al 21 slagoffers vlakke van metanol in hulle liggame gehad het. Die finale verslag dui egter glo aan dat hulle versmoor het, omdat die taverne oorvol was.
Intussen verskyn die taverne se eienaar vandag weer in die hof. Hy is kort na die voorval in hegtenis geneem omdat drank verkoop is aan minderjariges. Die jongste slagoffer was 13 jaar oud.
Die forensiese patoloog, dr. Hestelle van Staden het in ‘n onderhoud met eNCA gesê dat versmoring as doodsoorsaak nie so onwaarskynlik is nie.
