24 Mei 2023
Die Ekurhuleni metroraad – aan die Oos-Rand – het ‘n tender uitgereik om ses “Xbox Series X”-konsoles vir biblioteke aan te skaf om te voldoen aan die veranderende vereistes van die vierde industriële revolusie.
Volgens die raad sal dit skoliere help aangesien robotika ook as vak by die Suid-Afrikaanse skoolkurrikulum gevoeg word.
Tegnologieë wat gesien word om die vierde industriële revolusie te bevorder, sluit vinnige mobiele breëband soos 4G en 5G, grootskaalse masjien-tot-masjien-netwerke, kripto-geldeenhede, blokketting-tegnologieë en kunsmatige intelligensie in.
Die versoek om te tender sluit 25 Mei en maak voorsiening vir ‘n maksimum transaksiewaarde van R200 000.
Die tender gee voorkeurstatus aan bieërs wat ten minste 50% besit word deur vroue, jeugdiges en mense wat met gestremdhede leef.
Die tender maak ook voorsiening vir sekere speletjies soos FIFA 2023, Call of Duty: Modern Warfare, Forza Horizon 5, Mortal Kombat 11, Minecraft Dungeons en ‘n ongespesifiseerde Lego Star Wars-speletjie.
Kenners sê dit is onduidelik hoe Call of Duty: Modern Warfare en Mortal Kombat 11 Ekurhuleni sal help om die nuwe skoolkurrikulum aan te pak, aangesien die Film- en Publikasieraad aan albei speletjies ‘n 18-ouderdomsbeperking gegee het.
‘n Xbox Series X kos op die winkelrakke R12 000. Die speletjies kos tussen R950 en R295 per eenheid.
Sien die volledige tender-dokument hier: Re-advert-ALQ.SRAC_.05.01
