20 Maart 2023
Die burgerregteorganisasie, AfriForum sê, die EFF se “skouspelagtige mislukking om die land tot stilstand te dwing, wys weereens dat die party baie min steun het.”
AfriForum se woordvoerder oor gemeenskapsveiligheid, Jacques Broodryk sê alhoewel die party hard probeer het om op sosiale media die indruk te skep dat hulle die land ontwrig het, was dit duidelik dat die meeste mense soos normaal met hul dag voortgegaan het.
Hy sê daar was wel enkele sporadiese gevalle van geweldpleging en vandalisme deur EFF-ondersteuners, maar dié gevalle was geïsoleerd.
“Vandag se mislukte poging deur die EFF om mense se lewens te ontwrig, maak dit duidelik dat die groter meerderheid van die landsburgers nie die EFF se radikale sieninge deel nie. Die party het ook gemeenskappe se gereedheid om hul gebiede te beveilig onderskat,” sê Broodryk.
Hy sê AfriForum se meer as 160 buurtwagte landwyd is reeds sedert gister op ’n gereedheidsgrondslag.
