23 Junie 2023
Die EFF sê die Hoogste Hof van Appèl het deur middel van sy jongste grondbesettingsuitspraak ‘n sluimerende geweld ontketen wat onder die oppervlak gelê het.
Volgens ‘n woordvoerder van die party, Leigh-Ann Mathys, sal die EFF voortgaan om mense aan te moedig om grond te identifiseer en te beset waar hulle ook al nodig ag.
Sy sê dié beginsel is stewig gewortel in die party se beginsels.
LEES OOK: EFF MAG NIE OPSTOOK OOR GRONDGRYPERY NIE – APPÈLHOF
In reaksie op dié hof se weiering van sy aansoek om verlof tot appèl, het die rooi barette gesê die hof se jongste grondbesettingsuitspraak vergestalt die onderdrukkende aard van drakoniese apartheidswette.
Die uitspraak verbied die party om mense aan te moedig om op privaat eiendom te oortree.
Die EFF het die appèlhof genader nadat AfriForum in 2017 ‘n interdik deur die Pretoriase hooggeregshof toegestaan is.
