22 Maart 2023
Die ANC se sekretaris-generaal, Fikile Mbalula sê die EFF se poging om die land tot ‘n stilstand te dwing het misluk omdat Suid-Afrikaners geweier het om deel te neem aan ‘n teen-regeringsveldtog.
Mbalula het vanoggend ‘n mediakonferensie gehou oor die politieke situasie in die land. Hy sê die EFF wou hê dat hulle nasionale eendagstaking van Maandag die ekonomie moes lamlê, maar meen hulle kon nie daarin slaag nie.
Volgens Mbalula het die staking misluk weens patriotiese Suid-Afrikaners. Hy het namens die ANC Suid-Afrikaners en besighede bedank vir die standpunt wat hulle teen die EFF ingeneem het.
Hy meen gemeenskappe se samewerking met die polisie, asook ‘n verbetering in openbare polisiëring het daartoe bygedra dat geen ernstige gevalle van geweld aangemeld is nie.
Mbalula het verder gesê ná die ANC se 55ste Nasionale Konferensie het hulle besluit dat daar verskeie kwessies is waaraan die ANC dringend aandag sal moet gee. Dit sluit ‘n einde aan beurtkrag en die kragkrisis in, asook beter dienslewering. Volgens hom moet die kwessie van werkloosheid ook onder die loep geneem word.
Hy sê dit het duidelik geword dat meer gedoen moet word en vinniger om dringende kwessies in die land op te los.
“Ons sal in die komende weke ‘n program bekendstel wat sal behels dat die landswye ANC-takke in gemeenskappe diens doen om toe te sien dat dienslewering plaasvind.”
