9 Oktober 2024
Die EFF sê hy het ‘n klag by die Parlement se Etiekkomitee ingedien teen die minister van landbou, John Steenhuisen, omdat hy na bewering valse antwoorde verskaf het.
Die EFF-LP en partywoordvoerder, Leigh-Ann Mathys sê hulle het Steenhuisen in ‘n skriftelike parlementêre vraag gevra of hy van die normale werwingsprosesse afgewyk het toe hy vier individue in sy departement aangestel het.
Dié vier het nie die vereiste kwalifikasie of ondervinding om vir dié poste te kwalifiseer nie. Een van die aanstellings is glo Annette Steyn.
Die EFF voer aan dat Steenhuisen doelbewus bedrieglik met sy antwoorde was en dat hy probeer het om die aanstellings wettig te maak nadat die vier reeds aangestel is. Die EFF-LP, Sinawo Thambo het die klag ingedien.
Hy sê Steenhuisen het nou sewe dae kans om te reageer op bewerings dat hy sy “wit ongekwalifiseerde” vriende in die poste aangestel het.
