28 Junie 2021
Die polisie het bevestig dat klagtes wat verband hou met die oortreding van die Rampbestuurswetgewing amptelik teen die EFF aanhanging gemaak is na aanleiding van Vrydag se betoging wat voor die Suid-Afrikaanse Reguleringsowerheid vir Gesondheidsprodukte se kantoor plaasgevind het.
Duisende lede van dié party het na SAHPRA opgeruk onder die vaandel van ‘n “Optog om lewens te red”.
LEES OOK: EFF-OPTOG: POLISIE WIL GLO KRIMINELE KLAGTES AANHANGIG MAAK
Weinig tot geen Covid-19 veiligheidsmaatreëls is getref nie en daar was ook geen sprake van sosiale afstand nie.
Die EFF het onder die leiding van die leier, Julius Malema, betoog om die russiese entstof, Sputnik V en die Sjinese entstowwe, Sinupharm en Sinuvac, vir gebruik in Suid-Afrika goedgekeur te kry.
Die polisie het tydens die optog gesê dat luidens die rampbestuurswet moet betogers uiteengejaag word, maar hulle was bang vir moontlike “chaos” wat dit sou veroorsaak.
Die polisiewoordvoerder, kolonel Branda Muridili het toe gesê dat hulle sal oorweeg watter klagtes om teen die sameroeper van die optog aanhangig te maak.
