12 Junie 2024
Die minister van gesondheid, dr. Joe Phaahla het bevestig dat daar tot dusver vyf gevalle van apokke in die land aangemeld is, en dat een persoon Maandag in ‘n hospitaal in Thembisa dood is.
Hy het vanoggend ‘n mediakonferensie gehou oor die virussiekte. Volgens hom is al vyf pasiënte mans wat geen reisgeskiedenis na ander lande het nie, wat beteken dat daar plaaslike verspreiding is.
Volgens Phaahla is pasiënte meestal mans wat seksuele kontak met ander mans het, maar vroue is ook kwesbaar, sê Phaahla. Hy het ‘n beroep op mense met simptome gedoen om so gou moontlik hulp te kry, maar daar is tans nie geregistreerde behandeling vir apokke in Suid-Afrika nie.
Volgens die minister word die moontlikheid vir entstowwe in ‘n lae dosis oorweeg.
Die Wêreldgesondheidsorganisasie WGO versprei die entstowwe, wat die provinsies op hul beurt verder sal versprei.
