30 Desember 2021
Eenheid vier van die Kusile-kragstasie naby Witbank in Mpumalamga is uiteindelik aan die nasionale kragnetwerk verbind.
Vier van die eenhede van die kragstasie is nou aan die netwerk verbind en ‘n bykomende 800 MegaWatt krag sal nou opgewek kan word sodra die eenheid op sy volle kapasiteit werk.
Eskom sê ‘n reeks toetse moet nog gedoen word en die eenheid sal tydens die toetsperiode met onderbrekings oor die volgende ses maande werk.
Kusile is die land se grootste konstruksieprojek en sal die wêreld se vierde grootste steenkool-aangedrewe kragstasie wees as dit voltooi is.
Daar is reeds in 2008 met die bou van die omstrede kragstasie begin en dit was veronderstel om in 2014 voltooi te gewees het. Daar is egter probleme met die reuse drukketels ondervind nadat van die oorspronklike plan afgewyk is en korrupsie het ook ‘n rol gespeel. Die kragstasie sal glo nou eers in 2025 voltooi wees.
Die oorspronklike begroting vir die bou van die kragstasie het intussen verdubbel van R81-miljard na R161-miljard.
