21 September 2024
‘n Reuse brand het vroeg vanoggend by Cemetery View, die informele nedersetting agter die Woodlands inkopiesentrum in Pretoria, uitgebreek.
Die burgemeesterskomiteelid vir gemeenskapsveiligheid in die Tshwane-metro, Grandi Theunissen het aan Pretoria FM gesê dat een persoon doodgebrand het, en dat ‘n tweede persoon met ernstige brandwonde na die Steve Biko-hospitaal geneem is.
Volgens hom het ‘n vroulike inwoner van dié nedersetting ook ‘n miskraam gehad te midde van die brand.
Theunissen sê hy was vanoggend self op die toneel, en dat al die hutte afgebrand het. Tussen 2 000 en 2 500 mense is dakloos gelaat.
Die raadslid in daardie omgewing, Malcolm de Klerk sê die nooddienste kon sedertdien daarin slaag om die brand onder beheer te bring, maar meen die grootste gedeelte van Cemetery View is reeds verwoes.
Foto’s: Verskaf.
