4 April 2022
‘n 60-jarige man van Magdeburg, in Duitsland, word deur die polisie ondersoek nadat hy hom tot soveel as 90 keer teen Covid-19 laat inent het.
Die man – wat se identiteit ingevolge Duitse wetgewing nie bekend gemaak is nie – het dit gedoen sodat hy unieke entstofnommers kon bekom om aan mense te verkoop wat hulle nie teen die virus wou laat inent nie.
Hoewel die verdagte nie in hegtenis geneem is nie, het die polisie met ‘n ondersoek van bedrog begin nadat tien-talle inentingskaarte in sy besit gevind is.
Hy is uitgevang nadat hy hom twee dae agter mekaar by dieselfde sentrum wou laat inent het.
Dit is tans nie bekend watse uitwerking die entstof – van verskillende vervaardigers – op die man se gesondheid het nie.
