19 Januarie 2022
Die drukgroep, Mangaung Service Delivery Forum gaan vanoggend voort met sy betogings in die strate van Bloemfontein nadat samesprekings met die metro platgeval het.
Die betoging het byt die Lema inkopiesentrum begin, ondanks die metro se pogings om te keer dat die groep vir die volgende drie dae betoog. Een van die sameroepers van die groep, Vusi Nqele het egter benadruk dat daar geen geweld sal wees nie en meen werkers, wat wel wil werk, sal nié geïntimideer word nie.
Hy sê hulle gaan ook nie ondernemings en skole dwing om toe te maak nie. Die Mangaung Service Delivery Forum betoog onder meer oor beweerde korrupsie en nepotisme in die stad en eis ook dat dienslewering verbeter.
Nqele sê hulle eis ook dat die metro aandag moet skenk aan die kwessie van werkloosheid en armoede. Verder meen die groep dat onwettige immigrante die stad moet verlaat.
