2 Oktober 2022
Die vakbond, Solidariteit sê druk word op die uitvoerende hoof van Eskom, André de Ruyter geplaas om te bedank, nié weens beurtkrag nie, maar omdat hy korrupsie binne die kragvoorsiener onder die loep wil neem.
Die bestuurshoof van Solidariteit, dr. Dirk Hermann sê in ‘n verklaring dat De Ruyter nie net Eskom bestuur nie, maar ‘n anti-misdaad, -sabotasie en -korrupsie operasie.
LEES OOK: ESKOM KRY R30-MILJOEN TERUG VAN BRIAN MOLEFE SE PENSIOEN-UITBETALING
DIT kom nadat ‘n afluister-toestel vroeër vandeesweek in De Ruyter se motor gevind is. Alles dui daarop dat voormalige senior werknemers ook betrokke is.
Hermann meen De Ruyter staan op die suurstofpype van die misdaadsindikaat. Hy sê dit is juis hierdie sogenaamde misdadigers wat druk plaas op De Ruyter om te bedank, daarom heers daar sabotasie om kragopwekking te ontwrig.
“Die doel van sabotasie is tweeledig. Eerstens die destabilisering van Eskom om druk te plaas om van De Ruyter ontslae te raak. Tweedens word komponente gesaboteur sodat ‘verskaffers’, onder die dekmantel van swart bemagtiging, dit teen reuse premies kan vervang,” sê Hermann.
LEES OOK: SOLIDARITEIT PUBLISEER TENDERDOKUMENT WAT WYS OP BEWEERDE VAARDIGHEIDSTEKORT IN ESKOM
Hy sê die druk om van De Ruyter ontslae te raak is nie om Eskom reg te ruk nie, maar om Eskom verder te plunder.
“Die antwoord is nie om van De Ruyter ontslae te raak nie, maar om hom sterk te maak. Wat die regering moet doen om Eskom om te draai is om ‘n spesiale Eskom-ondersoekeenheid in die polisie aan te wys wat net daarop gefokus is om misdaadsindikate in en om Eskom uit te wis.
