9 Mei 2022
Die VF Plus veroordeel die voorval vandag in Koster waar drie ondernemings in ʼn plaaslike winkelsentrum afgebrand het en sê dit was weens die nalatigheid van die ANC-beheerde Kgetlengrivier-plaaslike munisipaliteit.
Stella Potgieter, die party se raadslid in dié raad – wat Derby, Koster en Swartruggens insluit – sê die brandweer het opgedaag sonder water in die brandweerwaens.
Volgens Potgieter het die brandkraan op die sypaadjie nie die nodige koppelstukke gehad nie en kon dit nie gebruik word nie.
Potgieter sê die VF Plus het met boere en plaaslike sakemanne in die omgewing geskakel om bystand te verleen met hul privaat-brandbestrydingstoerusting.
Sy sê dit is ʼn skande dat die inwoners van Koster weereens moet ly onder die wanbestuur, nalatigheid en onbekwaamheid van hierdie ANC-beheerde munisipaliteit, en dat die ramp voorkom kon word as die munisipaliteit sy basiese verpligting nagekom het om ʼn werkende brandweerdiens daar te stel.
