6 Desember 2021
Drie matriekleerlinge van die Hoërskool Ben Viljoen in Groblersdal in Limpopo is in ‘n motorongeluk op pad na Hartenbos dood.
Volgens ‘n inskrywing deur die skool, was dié drie, JG Greyling, Stiaan Grobler en Conrad Meiring op pad na die Wes-Kaap om die einde van hulle skool loopbaan te vier toe die ongeluk plaasvind.
Volgens die polisiewoordvoerder, kaptein Malcom Pojie het die ongeluk Saterdagoggend (4 Desember) tussen 01:00 en 02:00 op die N2 in die rigting van George gebeur toe die bestuurder na bewering beheer oor die motor verloor het. Al drie seuns was 18 jaar oud.
‘n Vierde passasier het die ongeluk oorleef, maar is beseer.
Volgens die skool se inskrywing is hulle geskok deur die nuus. “Dis ń droewige dag met die verlies van hierdie jong manne. Leerders vir wie avontuur deel van hulle lewenswyse was. Met ń glimlag het hulle die lewe aangepak. Elkeen met sy eie toekomsdrome en ideale. Altyd goed gemanierd en op hulle plek, staatmakers op verskeie terreine. Ons harte gaan uit na hulle gesinne.”
‘n Kransleggingsgeleentheid ter ere aan die drie seuns sal môreoggend by die skool gehou word.
