30 Augustus 2024
‘n Groot aantal lede van die gemeenskap het die hofverskyning van drie mans bygewoon nadat die liggame van twee vroue in ‘n varkhok op ‘n plaas naby Mankweng – in Limpopo – gevind is.
Die betogers sluit lede van die ANC, die EFF en die Suid-Afrikaanse Raad van Kerke in en is gekant daarteen dat die mans op borgtog vrygelaat word.
Die drie mans, ‘n plaaslike boer, Zachariah Olivier (60), en sy twee werkers, Adriaan de Wet (19) en William Musoro (45) staan tereg op aanklagte van moord, poging tot moord, die besit van ‘n ongelisensieerde vuurwapen en ammunisie en regsverydeling.
Musoro, ‘n Zimbabwese burger, word ook aangekla van ‘n oortreding van die immigrasiewet.
Die staat voer aan dat Mariah Makgato en Lucia Ndlovu na bewering na die plaas gegaan het om verouderde kos – wat op die plaas gestort word – te gaan haal, waar hulle geskiet en in die varkhok gegooi is.
Die saak is tot 10 September uitgestel, en die drie mans bly in aanhouding.
FOTO: Mankalema C Thema
