6 April 2021
Die broer van die ontslape Joost van der Westhuizen, Pieter van der Westhuizen gaan nié vervolg word nadat hy twee rowers in Julie verlede jaar tydens ‘n kerkdiens, doodgeskiet het nie.
Van der Westhuizen en sy vrou, Antoinette het op Sondag 26 Julie verlede jaar ’n erediens by die Querencia Bedieninge in Wierdapark, Centurion, bygewoon toe twee gewapende mans die kerk binnestorm.
Volgens destydse berigte het een van die verdagtes na die pastoor, Kobus Erasmus gehardloop en sy wapen teen sy kop gehou, terwyl die ander verdagte besig was om gemeentelede se persoonlike besittings te steel.
Van der Westhuizen, wat voorheen in die polisie was het opgetree en die verdagtes geskiet. Hulle is op die toneel dood verklaar.
Van der Westhuizen se regsverteenwoordiger, Ulrich Roux het in ‘n verklaring gesê dat die polisie in ‘n geregtelike doodsondersoek bevind het dat Van der Westhuizen uit selfverdediging opgetree het.
Roux sê die polisie het ook bevind dat sy optrede daartoe gelei het dat geen ander gemeentelede beseer is of dood is nie.
Roux het benadruk dat die dossier teen Van der Westhuizen gesluit is.
