30 November 2023
Donovan Moodley – wat lewenslange gevangenisstraf uitdien vir die 2004-ontvoering en moord op Leigh Matthews – het na bewering in 2012 beplan om uit die tronk te ontsnap en na Indië te vlug.
Besonderhede van die beplande ontsnapping is onthul in hofstukke wat deur Matthews se pa, Rob, ingedien is, in reaksie op Moodley se aansoek teen die paroolraad se besluit in Maart vanjaar, wat verdere profilering aanbeveel het en dat hy nie op parool vrygelaat moet word nie.
Kolonel Mark Henry de Bruin van die polisie het in ‘n beëdigde verklaring gesê hy is die eerste keer bewus gemaak van die komplot toe hy deur ‘n bron binne die Johannesburgse gevangenis gekontak is.
De Bruin sê die medegevangene het hom meegedeel dat Moodley navraag gedoen het oor iemand wat hom kan help om te ontsnap.
Die geregsdienaar het ‘n lokval opgestel, maar dit het glo platgeval nadat die departement van korrektiewe dienste sy samewerking onttrek het.
Uitspraak in dié aansoek is voorbehou.
