20 April 2023
Die VF Plus sê sowat R29-miljard sal benodig word om die Vrystaat se paaie te herstel.
Dié bedrag is aan die VF Plus gegee in ʼn antwoord van die provinsiale departement van gemeenskapsveiligheid, paaie en vervoer tydens ʼn portefeuljekomitee-vergadering.
Armand Cloete ‘n VF Plus lid van die provinsiale wetgewer in die Vrystaat sê die totale begroting vir die Vrystaat beloop sowat R41-miljard – die herstel van die provinsie se paaie sal dus 70% van die totale begroting beslaan.
Cloete sê hierdie departement se huidige begroting vir die komende finansiële jaar is R3,3- miljard wat aangewend moet word vir gemeenskapsveiligheid, paaie en vervoer.
Voorts het die departement ook erken dat vyf padkontrakte tans deur regsprosesse beslis word. Die waarde van die projekte beloop meer as R98-miljoen. Dispute tussen kontrakteurs en die departement is tans sub judice. Intussen bly broodnodige herstelwerk aan paaie onafgehandel.
“Daar is ook verskeie eise vir skade en beserings van padgebruikers teen die departement weens die toestand van die Vrystaat se paaie. Die eise beloop meer as R65-miljoen.”
Cloete sê die reuse bedrae wat die Vrystaat benodig om paaie ten volle te herstel, is die gevolg van byna drie dekades se wanbestuur, verkeerde begrotingsprioriteite, gefaalde swart ekonomiese bemagtiging en korrupsie onder die ANC-regering.
